«Euskadik oso zehaztuta dauden proiektuak dauzka», estrategikoak eta eraldatzaileak, eta, hortaz, Europako funtsetarako hautagai argiak direla esan du Eusko Jaurlaritzako Garapen Ekonomikoko sailburu Arantxa Tapiak, Espainiako Gobernuari «irizpide gardenak» eskatzearekin batera Hurrengo Belaunaldia funtsak banatzeko. Gasteizko gobernuak ez daki Madrilek zer irizpiderekin erabakiko duen funts garrantzitsu horiek banatzea, eta kezkaturik dago, susmoa duelako «proiektu ez hain eraldatzaileak» finantzatzeko erabiliko ote diren.
«Euskadik proiektu garrantzitsuak ditu, zehatzak eta enplegua sortuko dutenak», esan du Tapiak. Horietako batzuk martxan jartzen ari direla gaineratu du, Europako finantzaketaren zain egon gabe. Horregatik, uste du Espainiako Gobernuaren irizpideek «ahal bezain gardenak» izan behar dutela, «eta Europako Batasunak ezarritako eskaerei erantzuteko gai».
Tapiak abisu argia bidali dio, beraz, Pedro Sanchezen gobernuari, jakin dezan Jaurlaritzak Europako finantzaketa nahi duela bere proiektu estrategikoentzat. Ez du ezkutatu, gainera, funts horien truke egongo direla «betebeharrak». «Europako Batasunak zorra eskatu behar du funts horiei aurre egiteko, eta zor hori datozen belaunaldiek pagatuko dute; hortik dator funtsen izena». Tapiak uste du ezen, Madril ez bada gai funts horiek «modu egokian» baliatzeko, hiru edo lau urteren buruan «damutu» egingo dela beharbada.
