Baionako ASB Neskak errugbi taldeko jokalariek planto egin zuten azaroaren 7an, eta ez ziren zelairatu, Okzitaniako Tolosaren aurkako partidan. Baldintza txarrengatik, jokalari faltarengatik, eta entrenatzeko bitarteko eskasengatik protesta egin nahi izan zuten horren bidez. Eskaerei erantzun beharrean, klubeko zuzendaritzak erabaki du taldeak Frantziako Eliteko lehian egiten ari zen sasoia bertan behera uztea.
ASB zuzendaritza batzordeko kideek bozkatu zuten atzo taldearen sasoia amaitzea, ia aho batez (boto zuri bat egon zen, gainerakoak, zuzendaritzaren proposamenaren alde). Gilles Peynoche klubeko presidenteak France Bleu Pays Basque irratiari gaur esan dionez, erabakia «ez da zigorra, nahiz eta klubeko kideek gaizki hartu». Gaur bidali diote gutuna Frantziako Errugbi Federazioari, lehia uzteko erabakiaren berri emateko.
Peynochek adierazi du klubeko kideek eta boluntarioek gaizki hartu zutela jokalarien greba. Gaineratu duenez, segurtasuna arrazoiengatik hartu dutela sasoia amaitzeko erabakia, 50 jokalarietatik hamar bat lesionaturik daudenean 38-40 bat aurkeztuta jokatu beharra ezinezkoa dela.
Jokalariek esan zuten gogorra izan zitzaiela planto egiteko erabakia hartzea, baina ezinbestekoa zutela euren ahotsa entzunaraztea. Azken boladan hainbat jokalari joan direnez lehen lerro osoa falta zutela esan zioten zuzendaritzari, eta zehaztu zuten bigarren mailako taldeko jokalariak zelaira ateratzea haiek fisikoki arriskuan jartzea litzatekeela. Jokalariek esan zuten zuzendaritzak ez zituela serio hartzen, eta horregatik erabaki zutela keinu ikusgarri bat egitea, eta partida ez jokatzea.
Salatu zutenez, entrenatzeko ere larri dabiltza, jokalariak falta dituztelako, eta salatu dute prestaturik ez dauden jokalariekin aritzera behartu dituztela. Taldea zahartzen ari dela esan zuten, eta inbertsio gehiago egiteko eskatu zioten klubari. ASB taldeko jokalariak ez dira profesionalak: ez dute dirurik jasotzen errugbian jokatzeagatik.
Peynochek onartu du klubak ez duela baliabiderik Tolosako edo Montpellierko taldeekin lehiatzeko Elite mailan, baina erabaki zutela sasoia hastea, aurrera egingo zutelakoan. Haatik, egoerak eragina izan du taldearen emaitzetan, eta ligako azkenak dira.
Presidenteak hausnartzeko eskatu die Federazioari eta Baionako Udalari. «Elitean egoteko, piramide bat behar da. Piramidea formakuntza da, hezkuntza da».
