Atzean Zuloa egitasmoak umorezko ikus-entzunezko laburrak sortzen ditu, eta horietako bakoitzean, gizajende mota bati egiten diote barre. Bosgarren sasoia berehala estreinatuko dutela iragarri dute. Denera, hamar bideo argitaratuko dituzte. Sasoi honetan, berritasun bat daukate: bideoetako batean parodiatu beharreko pertsona mota jarraitzaileei proposatzeko eskatu diete.
👀🕳ï¸ÂAdi!!! 5. denboraldia hastera goaz @atzeanzuloa-n. 10 atal berri izango ditu, eta batzuk labean ditugu jada. Baina bat, gutxienez, zuen esku nahi dugu utzi.
— Atzean Zuloa (@AtzeanZuloa) January 18, 2022
Zein pertsona mota irudikatu beharko genuke datorren denboraldi honetan?
Bota zuen ideiak #atzeanzuloa traola erabiliz pic.twitter.com/mT9Vo9xcOx
Dagoeneko hasi dira proposamenak egiten: zikloturistak parodiaturik ikustea nahi du Urko Arana Twitterlariak, esaterako.
Nerea Aranburu eta Ivan Aizpurua aktoreek antzezten dituzte bideo esketxak. 2018. urtean hasi ziren lan horretan, Donostiako Bagera Elkartearen eta Hiru Damatxo ekoiztetxearen laguntzarekin. Orain arte, euskal gizarteko 32 arketipo parodiatu dituzte: ondozalea, Iparraldez maiteminduriko hegoaldetarra, furgonetazalea, artisau garagardoaren ebanjelaria... Horietako bakoitzak berezia dela uste duen arren, beste edonork bezala atzean zuloa daukala argi uzten saiatzen dira.
«Euskararekiko zenbait jarrera deseraikitzea zen helburua, era anonimo batean. Betiere, ironia eta umorearen bidetik, gehienok gugan ditugun kontraesanetan arakatuz. Beste modu batetara esanda, nor bere erosotasunetik ez ateratzeko erabiltzen ditugun diskurtso eta jarrerak deseraiki nahi genituen», azaldu dute sortzaileek.
«Ezbairik gabe, geure buruari barre egitea da asmoa», esan zion Aranburuk BERRIAri.