Gerrak dakarren ziurgabetasunak baldintzatutako testuinguruan, kopuru onekin egin ditu Kutxabankek aurtengo lehen hiru hilabeteak, «core negozioaren sendotasunari esker eta, besteak beste, interesen marjinak uste baino hazkunde handiagoa izan ostean».
Core negozio horretan, hori bai, entitateari maileguen interesetatik baino sarrera gehiago etorri zaizkio zerbitzuen komisioetatik eta aseguruetatik; bi jarduerek, inbertsio funtsekin eta pentsio planekin batera, jada Kutxabanken negozioaren %53 hartzen dute.
Ildo horretan, aipatzekoa da aseguruen merkaturatzean lortutakoa: hiru hilabetetan 35.000 aseguru poliza iritsi ditu Kutxabankek, 2021eko martxoan baino %10,2 gehiago. Gaur egun, entitatearen polizen stocka 927.000tik gorakoa da, eta jarduera horretatik 43,9 milioi euroren diru sarrerak gehitu dizkie taldearen emaitzei.
Balantze kanpoko baliabideetan ere goraka jarraitzen du finantza entitateak. 21.000 milioi euro kudeatzen ditu inbertsio funtsetan, eta haren merkatu kuota %6,75era handitu du.
Mailegu negozioan ere hazkundea izan du Kutxabankek, %6 igota, 46.514 milioi euroraino. Hipoteka mailegu berrietan, 1.062 milioi eman ditu lehen hiruhilekoan, eta kontsumo kredituetan, berriz, %11,6 hazkundea izan du, iazko datuekin alderatuta.
Bestalde, taldeak zalantzazko aktiboen saldoa murrizten jarraitu du; 30 milioi euro baino gehiago 2022ko lehen hiruhilekoan; aktibo horiek 911 milioi eurokoak dira orain. Horrekin eta kreditu inbertsioaren saldoaren hazkundearekin, Kutxanbankek inoizko berankortasun tasarik txikiena du, %1,8tik beherakoa, sektoreko batezbestekoa otsailean %4,3koa izan zenean.
Kutxabankek azaldu du ere bere bezero guztien % 58,5 direla erabiltzaile digitalak, eta Online banka eta Banka mugikorrak dagoeneko kontratu guztien % 44 hartzen dituztela.
