Azken orduetan Bilboko hilketen susmagarriaren aurka Katalunian aurkeztutako salaketaren harira hitz egin du gaur goizean Josu Erkoreka Eusko Jaurlaritzako Segurtasun sailburuak, eta adierazi du salaketak baieztatzen duela susmagarriak beste lurralde batzuetan ere delituak egin izanaren zantzuak daudela, eta «Euskaditik kanpo ere» aritu dela. Bartzelonan jarri den salaketaren inguruko informazio guztia bidali diote mossoek Ertzaintzari, Erkorekak jakinarazi duenez.
Poliziak Valentziara eta Madrilera (Espainia) ere zabaldu ditu ikerketak, eta ez da baztertzen susmagarriak beste delitu ekintza batzuetan parte hartu izana.
Eusko Jaurlaritzak maiatzaren 6an jakinarazi zuenez, Ertzaintza Bilbon hilik agertutako sei gizonen heriotza ikertzen ari da. Susmagarritzat jo zuten gizonezko batek bere burua aurkeztu zuen polizia etxean, eta epaileak hura espetxeratzeko agindu zuen. Atzo, ordea, La Vanguardia egunkariak jakinarazi zuen Katalunian ere identifikatu dutela ustezko hiltzailea; antzeko erasoen biktima izan ziren bi gizonezkoren testigantzak jaso ditu. Orain, kasu guztien arteko lotura posibleak ikertzen ari dira.