Iruñeko Arrotxapea auzotik Labriteranzko norabidean zihoan auto batek bikote bat harrapatu du goizean, 09:50ean. Biak Nafarroako Ospitale Unibertsitariora eraman dituzte, baina emakumea hil egin da. 84 urteko gizonezkoa larri dago.
Udaltzaingoaren arabera, Vergel kalean izan da, Arrotxapea Magdalena auzoarekin lotzen duen errepidean. Aldapa baten amaieran oinezkoentzako pasabide bat dago, eta bertan izan da ezbeharra. Autoaren norabidean ezkerretik eskuinerantz zeharkatzen ari ziren bi oinezkoak.
Iruñeko Udaltzaingoa arduratuko da ezbeharra ikertzeaz. Autoaren gidaria 53 urteko emakumea da, eta, alkohol eta droga testak eginda, negatibo eman du.
