Eskolarako bidea hartu dute berriz Ipar Euskal Herriko ikasleek udako bakantzen ondotik. Bi ikasturtez, COVID-19aren pandemiaren neurriek baldintzatu dute eskolako bizia; baina, aurten, protokolorik gabe egin dute sartzea. Hiru hezkuntza sistemetako haurrak hasi dira berriz lanean, eskola publikoetan, pribatu katolikoetan zein ikastoletan. Ikastoletan, hain zuzen, «erronka handiak» izanen dituztela azpimarratu du Peio Jorajuria Seaskako lehendakariak.
Jorajuriak azaldu du aurten 100 bat ikasle gehiago izanen direla Ipar Euskal Herriko ikastoletan, eta «desafio» handia izanen dela. Halere, ez dute ikastola berririk irekiko; azkena iragan ikasturtean ireki zuten, Beskoitzen (Lapurdi). Baina proiektu handi bat du Seaskak abiaturik: bosgarren kolegioa eraikitzen hasiak dira, Senperen (Lapurdi).
Bestalde, azterketak euskaraz pasatu ahal izateko eskubidea aldarrikatzen segituko dute, ikasturte hasieratik. Izan ere, iaz borroka handia eramanik ere, ez zuten lortu aspalditik eskatzen duten eskubidea. Irailaren 14an biltzekoak dira Pap Ndiaye Frantziako Hezkuntza ministroaren kabinetearekin Euskararen Erakunde Publikoko ordezkariak eta Ipar Euskal Herriko diputatu eta senatariak.