Behargin batek bizia galdu du gaur Donezteben (Nafarroa), N-121-A errepideko asfaltatze lanetan zebilela. Antza, 13:24an makina zanpatzaile batek harrapatu du langilea, errepidearen 49. kilometroan, eta hil egin da. Foruzaingoak ikerketa bat abiatu du, heriotzaren nondik norakoak argitzeko.
Langileak 42 urte zituen, eta Barañaingoa (Nafarroa) zen. Istripua N-121-A errepideko 49. kilometroan izan da, Doneztebe eta Sunbilla artean dagoen La Kontxa zerbitzugunetik gertu. Eskualdeko zerbitzu medikoak, suhiltzaileak eta Foruzaingoa gerturatu dira, baina haiek iristerako hilda zegoen gizona, istripuaren unean bertan galdu baitu bizia. Obenasa Nafarroako Obra Berezietarako enpresa ari da lan horiek egiten.
LAB sindikatuaren zenbaketaren arabera, 67 lagunek galdu dute bizia aurten lanean Euskal Herrian.