Ertzaintzak 45 urteko emakume bat eta 18 urteko bi gizonezko atxilotu ditu Sestaon (Bizkaia), hilketa saiakera batekin zerikusia dutelakoan. Epailearen aurretik igaro ostean, gazteetako bat aske utzi dute, eta beste biak espetxera bidali dituzte. Itxuraz, emakumeak senarra hiltzeko eskatu zion, diru truke, gizonezkoetako bati.
Eusko Jaurlaritzako Segurtasun Sailak kontatu du. Haien esanetan, ostiral gauean jende gutxi ibiltzen den Sestaoko paraje batera joan zen bikotea, eta emakumeak telefono dei bat jaso zuen. Autotik atera zen, eta atea zabalik utzi zuen. Orduan, ezezagun bat autoan sartu zen, eta gizonari kolpeak eman zizkion, eta aizto bat lepoan sartzen saiatu zen. Biktimak, ordea, erantzutea lortu zuen, eta, liskar baten ondoren, erasotzaileak ihes egin zuen.
Biktimak larrialdi zerbitzuei deitzea lortu zuen, eta Ertzaintza eta osasun langileak erasoaren lekura iritsi ziren. Zaurien ondorioz, gizona ospitale batera eraman behar izan zuten, baina egunean bertan jaso zuen sendagiria.
Ertzaintza gertatuakoa ikertzen hasi zen, eta ondorioztatu du emakumeak ezagun bat konbetzitu zuela diru truke senarra hiltzeko. Gainera, egindako azterketekin, ikusi dute espetxera bidali duten gizonezkoa ostiral goizean biktimaren etxera joan zela delitua egiteko asmoarekin, baina azkenean ez zuela egin.
Larunbat arratsaldean atxilotu zuten emakumea, eta gauean kartzelara bidali duten gizona. Igande goizean atxilotu zuten hirugarrena, gertakariekin zerikusia duelakoan. Atzo pasatu ziren hirurak Barakaldoko epaitegitik (Bizkaia), eta espetxera bidali zituen emakumea eta senarra hiltzea eskatu zion gizona; bestea aske geratu zen.
