Igandean Gasteizen labanaz eraso bat izan zela eta, Gorka Urtaran Gasteizko alkateak proposamen bat egin du: arma horiek eramateagatik ezarritako zigorrak zorroztea, eta diskoteketako sarreretan metal detektagailuen erabilera baimentzea. Era berean, igandeko indarkeria ekintza «erabat» gaitzesten duela berretsi du, eta babesa agertu die hiru biktimei, «lehenbailehen eta ondo senda daitezen».
Urtaranek berak adierazi duenez, gertatutakoa ez da kasu bakan bat: «nahi baino maizago gertatzen diren egoerak» direla salatu du. Gasteizen edo Euskal Herrian ez ezik, Espainian ere ugaritzen ari dira labanaz egindako erasoak, eta, ondorioz, orain da, Urtaranen ustetan, neurriak hartzeko garaia. «Hausnartzeko sasoia da; administrazio eskudunek kontuan hartu behar dute zer neurri ezar daitezkeen».
Euskal Udalen Elkarteak aste honetan duen bileran landu beharreko gaia izan daitekeela esan du Gasteizko alkateak.
