Athletic, Kopako finaletik at

Athleticek hiru aldiz irabazi du liga. Aurten bete dira 20 urte lehen garaikurra altxatu zuenetik. Baina badu arantza bat Espainiako Koparekin. Bi aldiz iritsi da finalera, 2012an eta 2014an, baina txapeldunorde izan zen. Denboraldi honetan ere ezin izango du atera. Finalerdietan amaitu da zuri-gorrien bidea aurtengo txapelketan, 0-4 galdu baitu Real Madrilen aurka. Iraia Iturregiren taldea ezinean aritu da espainiarren joko bizi eta zuzenaren aurrean. Hala, amaitu da denboraldia Athleticentzat.

Berez du talde gaztea Athleticek. Bada, atzo are gehiago. Mariasun Quiñonesengandik harago, Iraia Iturregik aulkian utzi ditu eskarmentu gehien duten jokalariak: Nekane, Yulema Korres, Eunate eta Itxaso Uriarte, besteak beste. Hasieratik jokatu dute, berriz, Landaluzek, Maite Zubietak eta Amezagak. Beste berritasun bat Oihane Hernandezen kokapena izan da, atzean aritu beharrean zelai erdian aritu baita, Landaluzerekin batera, hegaletik sartu den Linda Caicedo geratzeko asmoz.

Real Madrilek bere lehen titulua nahi du, eta espero bezala estutuz ekin dio norgehiagokari. Zelai erditik aurrera dituen jokalarien ahalmen fisikoaren bidez partidari erritmo bizia jarri dio, eta baloia oso bizkor mugitu du. Espero zuten zuri-gorriek hori, eta, horri aurre egiteko, zelai erdian jokalari asko pilatu, eta lerroak batuta edukitzen ahalegindu dira. Denboraldiko azken txanpa honetan izandako sentipen onei segida eman nahi zieten. Ez da posible izan. Jokatzeko era horri eusteko, golik ez jasotzea behar zuen Iturregiren taldeak. Baina Real Madril 0-1 aurreratu da 6. minutuan; Weirek egin du gola. Mariasun Quiñones aurreratua zegoela ikusi, eta modu ikusgarrian loratu dio baloia. Ia segidan, Caidedok erremate bat bidali du zutoinera.

Athletic kontrakarrean ari zen. Real Madrilek atzean sartuta zeukan. Gainera, zuri-gorriek baloia zuten apurretan, baloia ateratzean ezin zuten gainditu aurkariak egindako presio estua. 20 minutu inguruan, espainiarrek erritmoa apaldu dute zertxobait, eta Iturregirenek arnasa apur bat hartu dute. Baloia izan dute, baina aukerarik sortu gabe. Gainera, Real Madrilek beste bi gol sartu ditu atsedenaldia baino lehen. Bat Maite Zubietak sartu du, bere atean, Tolettik punpa lasterrean egindako erremate baten ostean, eta bestea Atheneak, atzetik etorrita, Kathlenek egindako erdiraketa bat baliatuz. Lehen zatiak, gainera, izan du beste albiste txar bat zuri-gorrientzat. Izan ere, Valdezatek zelaia utzi behar izan du, belaunean min hartuta.

0-3koarekin, Athleticek maldan gora zuen kanporaketa, eta are gehiago zaildu zaio, bigarren zatiko lehen jokaldian Weirek laugarrena sartu duenean espainiarrentzat. Errenta hori baliatuz, Real Madrilek zertxobait lasaiago joka zezakeela pentsa zitekeen. Hala egin du. Baloi jabetza luzeen bidez, minutuak pasatzen utzi du. Athletic saiatu da gutxienez gol bat egiten, baina ez du lortu, apenas gerturatu baita Misa Rodriguezen atera. Iraia Iturregik aukera eman dio Nekane Diezi zelaian agurtzeko. 66. minutuan atera da, Ogizaren ordez. Aurrelariak erretiroa hartuko du, talde zuri-gorrian hamasei denboraldi jokatu ostean.