Zinkak eta Kortazarrek irabazi dute Izarraitzen

Abiatu da mendi lasterketen egutegi ofiziala, ziztu batean abiatu ere. Zuzenien igoera bertikala jokatu zen igandean, Azpeitian, eta Ionut Zinka eta Oihana Kortazar izan ziren herriko plazatik Xoxoteraino igotzen azkarrenak. Igoera bertikalak lasterketa motzak dira distantzian, baina desnibel handikoak, eta igandean 800 metroko tartea igo zuten lasterkariek 2,8 kilometroan.

Aurreko egunetako eguzkiari lainoek eta euriak hartu zioten lekukoa, eta euripean jokatu zen Zuzenien. Erlojupeko formatuan jokatu zen igoera, eta 200 lasterkarik parte hartu zuten. Guztietan azkarrena Ionut Zinka izan zen, 29 minutu eta 19 segundoko denborarekin. Errumaniarrak ez zuen Aitor Osaren marka ontzerik izan, baina alde handia atera zien gainerako lasterkariei. Lokatz artean dotore ibili ziren Iñigo Lariz eta Luis Alberto Hernando ere. Larizek 30 minutu eta 49 segundo behar izan zituen 2,8 kilometroak osatzeko; Hernandok, berriz, 31 minutu eta segundo bat.

Emakumezkoetan iazkoa bukatu bezala ekin dio aurkengo denboraldiari Oihana Kortazarrek. Salomon taldearekin fitxatu du, eta estreinaldi dotorea izan zuen igandekoa. Azpeitia eta Xoxote 36 minutu eta 17 segundoan lotu zituen Kortazarrek. Podiuma Nerea Amilibiak (38:17) eta Oihana Azkorbebeitiak (38:37) osatu zuten.

Euskal Herriko Lasterketa Bertikalen Zirkuituko lehenengo lasterketa izanik, Zuzenien probako sailkapenaren araberakoa da kopako sailkapena ere. Zinka eta Kortazar dira sailkapen buru. Abaltzisketan jokatuko da bertikalen bigarrena, ekainaren 17an: Txindoki Bertikala.

Transgrancanaria jendetsua

Bestelako ezaugarriak izan zituen Kanariar uharteetan asteburuan jokatu zen Transgrancanariak. Eguraldi eguzkitsuarekin 1.800 lasterkarik parte hartu zuten proba desberdinetan. Luzeenak 123 kilometro zituen, eta euskal lasterkariek komeriak izan zituzten —iazko irabazle Zigor Iturrietak tripako arazoekin lasterketa utzi behar izan zuen—. Jose Vicente Benito izan zen aurreneko euskal lasterkaria, 12. helmugaratuta.

Distantzia laburragoko lasterketetan Lidia Gomez bilbotarrak egindakoa nabarmendu behar da: 96 kilometroko lasterketa irabazi zuen.