Bi orduko ikuskizun "koloretsu eta bizia" izanen da, antolatzaileek adierazi dutenez. 70 lagun inguru arituko dira arizale, kantari, dantzari, musikari Joxemiel Bidador zenaren omenez eta Iruñerriko euskaldunei gorazarre egiteko.
Emanaldiaren aitzineko giroa berotzeko bi hitzaldi emanen dituzte: hilaren 8an Sahats-IKA euskaltegian (Kike Diez Ulzurrun) eta 9an Barañaingo Haize elkartean Jon Alonso idazlea eta Patxi Larrion historialaria ariko dira solasean.
Sarrerak salgai daude 10 euroan Karrikiri dendan (Iruñeko Xabier karrika, Alde Zaharrean) eta Auditorioaren webgunean. Duguna Dantza Taldea, Zaldiko Maldiko elkartea, Euskaldunon Biltoki eta Karrikiri Elkartea dira antolatzaileak.
