Jesus Narvaez eta Esperanza Azkarraga bildumagileak omendu dituzte gaur Mutrikun (Gipuzkoa), bertako hondartzetako labarretatik amoniteak ateratzen egindako lanagatik. Nautilus izeneko didaktika gela inauguratu dute, eta han gordeko dituzte senar-emazteek azken 45 urteetan ateratako fosil erraldoiak.
Munduko amonite bildumarik handienetariko bat da geoparkearen esku utzi dutena. Didaktika gela ondare paleontologikoa kontserbatu eta balioesteko erabiliko dute orain, eta baita ezagutzaren transmisiorako ere. Esaterako, Mutrikuko Lehen Hezkuntzako 1. mailako ikasleak bertan izan dira gaur, didaktika gela bisitatzen eta prestatutako jarduerak egiten.
