About.me: sareko aurkezpen txartela

About.me web zerbitzuaren bitartez nork bere sareko aurkezpen txartel erakargarri bat sor dezake era erraz batean eta debalde. Web zerbitzu honen helbidea http://about.me da, eta hor posta elektronikoa, pasahitza eta profilerako erabiltzaileak nahi duen helbidea edo URLa aukeratu behar du helbide horretatik hasita.

Hori eginda, atzealdeko argazki bat ezarri ahal da, eta sare sozialetako profilak zein Internet zerbitzuen, webguneen edo RSSen helbideak gehitzen joan daitezke. Itxura are gehiago pertsonalizatu daiteke, koloreak eta letra mota ezberdinen artean aukeratu baitaiteke informazioa erakusteko. Estatistikak ere eskaintzen ditu zerbitzu honek: honela, ikus daiteke norberaren aurkezpen txartela nork bisitatu duen, bertan klik nork egin duen, edo profilaren lotura jarri duten erabiltzaileak zeintzuk izan diren. Halaber, sare sozialei buruzko oinarrizko estatistikak ere erakusten dira.

Hala, web zerbitzu honen bitartez, norberak eratu ahal du profil erakargarri bat bere on-line presentzia eta informazio publikoarekin. Era horretan, sartzen denak ikusi ahal izango ditu erabiltzailearen sarrerak edo lagunak sare sozialetan eta blogetan, edo posta elektroniko bat bidali ahal izango dio erabiltzaileari, berarekin harremanetan jartzeko.