Akilesen orpoa

Ez dakit oso ondo zeinek daukan arrazoia aire kontrolatzaileen eta Zapatero-Rubalcaba izatezko bikotearen arteko borrokan, baina nago alde biek gaizki neurtu dituztela euren erantzunak. Batzuk —ustezko galtzaileak— agian damutuko dira, ziegako leihotik zerua kontrolaezina baita. Besteek—ustezko irabazleek— bizkarrekoak emango dizkiote elkarri, eta, jarraian herri xeheari kontatuko diote zein ederki zapaldu duten aireportuetako aberaskumeen matxinada.

Zertan ari ziren pentsatzen kontrolatzaileak? Dena hankaz gora jarri zuten noiz eta oporrak hastear zeudenean! Baina non bizi dira? Ilargian ala? Espainiarrak dira, demontre! Eta espainiarrak izaki jakin beharko lukete Espainia ez dela lurralde bat, ezpada parke tematiko bat, Marina d'Or erraldoi bat, oporretarako lurralde bat non oporrak, zubiak, akueduktuak eta era guztietako atsedenaldiak Botafumeiroa bera baino sakratuagoak diren. Eta, hala ere, ausartu ziren herrikideak izorratzen! Kalamidadeak!

Eta Zapatero-Rubalcaba tandema pozik, alarmaren botoia sakatzearena ez baita eguneroko kontua. Zeinek daki, agian etorkizunean damutuko dira. Izan ere, orain munduko gaizkile guztiek badakite zein den mendebaldarron Akilesen orpoa. Ez erregeak, ez estatu-buruak… gure mundua pikutara bidali nahi baduzu, aski duzu aire kontrolatzaile guztiak garbitzea.

Ni konturatu banaiz, zenbat denbora beharko du Bin Ladenek horretaz jabetzeko…?