Gizakiaren eskubideak irudiaren bidez babestea. Lelo horren pean jaio zen Begiradak elkartea, orain zazpi urte. Asmo horrexekin antolatu du elkarteak, hain zuzen ere, Hendaiako (Lapurdi) Les Halles aretoan dagoen erakusketa: Contre l' oubli (Ahanzturaren aurka). Giza eskubideen ahanzturaren aurka borrokatu nahi dute erakusketaren bidez.
Abuztuaren 15a arte egongo da ikusgai erakusketa. Ehun bat artelanen bidez giza ekintzei buruz kontzientzia hartzea proposatzen zaio bisitariari. Artelanez gain, Begiradak elkarteak kontzertu gaua eta otordua eskainiko ditu hilaren 14an, Euskal Bestaren harira. Ekitaldi horietatik ateratako etekina Suhiltzaileen Nazioarteko Sorospen eta Garapeneko gobernuz kanpoko erakundeari emango diote.
Begiradak elkartearen xedea da bidegabekeriak ahaztu ez daitezela. Informazio askatasuna, adierazpen askatasuna, hedabideen bidez egoki informatuta egon ahal izateko eskubidea... Giza eskubideekin loturiko gaiak gogoraraziko dizkiote erakusketako artelanetako irudiek bisitariari.
Talde lanean oinarrituriko erakusketa bat da Begiradak elkarteak jarri duena. Hainbat artista ezezagunen lanak egongo dira ikusgai.
Hasieran, Begiradak argazkilaritza elkarte soil bat zen, baina betidanik izan du artea eta kultura pertsona orori eskuragarri egiteko joera.
Gerizpean. Uda-pasa
Artea ahanzturaren aurka
Giza eskubideak ditu ardatz Begiradak elkarteak Hendaian antolatu duen erakusketak
Iruzkinak
Ez dago iruzkinik
Ordenatu
