Artisten konstelazio bat

Gaurko egunez, 1809. urtean, Joseph Haydn musikaria hil zen; 1819an, Walt Whitman poeta jaio zen, eta 1993an, Eusebio Erkiaga Alastra idazlea hil zen. Beste gauza asko gertatu dira maiatzaren 31n, eta norberak osa ditzake bere efemerideak. Hain zuzen ere, horixe egingo du musikari eta artista talde batek gaur Bilboko Alondegian, Gora Japon taldeak antolatuta.

«Zer efemeride da zuretzat garrantzitsua?». Galdera egin die Gora Japonek hamahiru gonbidaturi. Horietako bakoitzak, gertaera bat aukeratu, eta horren inguruko pieza labur bat egingo du taldearekin elkarlanean. Esperimentua da; ez dute aurretik probarik egingo, eta dena begi bistan egongo da: kableak, argiak, okerrak eta zuzenak.

Musikariak, koreografo-dantzariak, margolariak, idazleak, disko jartzaileak arituko dira: Inazio Eskuderok musika esperimentala lantzen du. Tzesne-Paralux bikoteak ikus-entzunezkoak sortzen ditu, eta zuzenean eskaintzen ditu, barne-zinema mugimenduaren ildotik. Unai Kerexeta dantzaria da. Horiez gain, Anari, June Crespo, Idoia Zabaleta, Tea Party, El Monstruito eta Ambrosse arituko dira Efemerideak jaialdian.

'EFEMERIDEAK'

Noiz. Gaur, 21:00etan.

Non. Alondegian, Bilbon.

Sarrera. 12 euro (10 aldez aurretik erosita). 400 pertsonarentzako lekua dago.