Irabazi asmorik gabeko mugimendu bat izan arren, tasa komertziala aplikatzen die Eusko Jaurlaritzak Donostiako Piratei, kaia salerosketa gunea da eta: “Norberaren poltsikoak betetzeko interesa besterik ez duten enpresak bezala tratatzen gaituzte. Ez luke hala izan behar”.
Prentsaurrekoa egin dute, kaian bertan, eta Jaurlaritzarekin akordio bat egiteko borondatea azaldu dute Piratek. Malgutasuna eskatu dute. Hau da, salerosketa hori ez dagoen leku eta momentuetan tasa ez-komertziala aplikatzea: muntatze eta desmuntatze egunetan, eta agertokiaren eta komunen eremuan.
Donostiako Piratak hamabost urtez ibili dira lanean "jai herrikoi, euskaldun, askatzaile eta parekideen alde". Hala ere, esan dute hainbat oztopo gainditu behar izan dituztela urtero: irizpide aldakorrak, azken momentura arte zehaztu gabeko erabakiak...
