Elgetako Espaloia antzokian izango da (Gipuzkoa), bihar, Euskal Mendizale Federazioak (EMF) behin-behineko zuzendaritza aukeratzeko deitu duen Aparteko Batzar Orokorra. Bi zerrenda aurkeztu dira, eta horietako batek izango du datozen hilabeteetan EMF gidatzeko ardura: Alvaro Arregi buru duenak eta Roberto Agirrerenak. Batzarreko lehen deialdia 11:00etarako egin dute, eta bigarrena, 11:30erako. Mendi taldeek eta elkarteek, federazioek eta mendizaleek dute orain azken hitza.
Nahasia dago giroa federazioan azken urteetan, eta gorabehera horien ondorioa da biharko eguna ere. Alvaro Arregi buru duen taldeak zentsura mozioa aurkeztu zuen urrian Txomin Uriarte presidentea buru zuen zuzendaritzaren kontra, eta aurrera atera zen eskaera. Hori horrela, Uriarte ordezkatuko duen behin-behineko zuzendaritza aterako da biharko batzarretik, eta 2012an egitekoak diren hauteskunde ofizialak egin arte EMFren jarraibideak zehaztu beharko ditu.
Elgetako biharko gai zerrendak gai bakarra du: hauteskundeak. Mahaia izendatuko dute aurrena, eta hautagai bakoitzak dituen asmoen berri azaltzeko modua izango du ondoren. Batzarreko kideen galderak eta esan beharrekoak bukatu ondoren egingo dute bozketa. Boto gehien duen hautagaitzak hartuko du zuzendaritza.
Mendia
Behin-behineko zuzendaritza aukeratuko du bihar EMFk
Alvaro Arregi eta Roberto Agirre hautagai direla egingo dute, Elgetan, lehendakaria aukeratzeko batzarra
Iruzkinak
Ez dago iruzkinik
Ordenatu
