Amaitzear da irailaren bukaeran Baigorrin (Nafarroa Beherea) hasitako bidaia. Igandean BECen entzungo diren bertsoak eta hitz errimatuak izango dira 2017ko Bertsolari Txapelketa Nagusian adituko diren azkenak. Egun handiaren zain dira zortzi bertsolari, eta, haiekin batera, bidaia horretan atzetik segika izan dituzten zaleak. Haizea eta Oihana Arana, Joxe Garaizabal eta Alazne Untxalo dira txapelketa saioz saio jarraitu duten lau zale amorratu.
Orain arte txapelketa nola ikusi duten eta iganderako zein aurreikuspen dituzten kontatu dute. Haien hitzak eta nahiak jaso dira biharko BERRIA egunkarian argitaratuko den erreportajean, Bizigiro gehigarrian.
Horretaz gain, Izarkom Euskal Herriko telekomunikazio operadore kooperatiboaren berri emango du. Euskal Herri osora zabaldu nahi ditu bere telekomunikazio zerbitzuak. Herrialdeko edozein puntutan Internet konexio irisgarria eta eskuragarria izatea da kooperatibaren helburuetako bat, eta herrigintza sustatzea beste bat.
Bizigiro gehigarrian, gainera, Ormaztegiko (Gipuzkoa) Kuko jatetxeko Iker Markinez sukaldariaren errezeta topatuko du irakurleak: Txipiak plantxan tipula goxatu eta letxugarekin.
