Beste aldearekin hizketan

Hil ondorengo bizitza kezka zaio gizakiari arrazoimenez jokatzen hasi zen momentu beretik. Jakin-min hori lehen pertsonan bizi, eta bizimodu bilakatzea lortu dutenei medium deitu izan diete beti, bizitzaren mugak hautsi eta hildakoekin hitz egin dezaketen gizakiak.

Aste honetan, Donostiako Esoterismoaren XVIII. Aretoan, nazioarteko medium ezagunetarikoek bat egingo dute Miramar Jauregian. Mikel Lizarralde urretxuarra izango da horietako bat, eta Mediumnidad: Claves para entenderla y desarrollarla hitzaldi-tailerra emango du gaur (18:00). «Geure dohainak ezagutzeko aukera» dela dio Lizarraldek.

Mediumen mundua ezagutzeko gakoak eskainiko ditu Lizarraldek gaukoan, bere zentzu zabala ulertu eta «bizitzaren ondoren bizitza dagoela frogatzeko». Horretarako, «gizakiek berezko dituzten botereak» ezagutzea eta heriotzari beldurra ez izaten ikastea proposatuko du.

Saioa guztiz dinamikoa izango da. Hitzaldi soilaz harago joan, eta hildakoekin kontaktatzen saiatuko da, saiora bilduko diren ikusleen laguntzaz. «Kontzientzia zabalduko diegu, beren kezkak askatzeko eta bakean sentitzeko».

Baina argi utzi du bere helburua ez dela inor konbentzitzea, «berezko dugun seigarren zentzu bati ateak zabaltzea» baizik.

'MEDIUMNIDAD...'
Non. Miramar jauregian.
Noiz. 18:00etan.
Sarrera. 20 euro.