Egitarau oparoa prestatu dute Zumaian igandera bitartean

Jai giroak ez du etenik izango Zumaiako (Gipuzkoa) sanpedroetan. Falcons de Villafranca taldearen kalejira izango da eguerdian Erribera kalean, eta Udal Musika Bandak kontzertua emango du. Gari, Montxo eta Joselontxo pailazoen Konfetti ikuskizunarekin gozatu ahal izango dute haurrek, Aita Marin, 18:30ean. Gauean, DJ Xaboirrek gaztetxoei musika jarriko die, Kofradian, eta su festa egongo da, Astondo piroteknia etxearen eskutik.

Haurrentzako jolas parkea egongo da, bihar goizean. Dardara perkusio taldeak kaleak dardarka jarriko ditu arratsaldean, eta, horrez gain, herri kirolak eta Mariatxien kontzertuak izango dira Eusebio Gurrutxaga plazan. Gaztetxean ere musika egongo da gauean. Etzi haurrentzako puzgarriak eta herriko abesbatzen udako kontzertua izango dira, besteak beste.