Eguzki Irratiak 500 bazkide lortu nahi ditu, gutxieneko dirua ziurtatzeko

Eguzki Irratiak gutxienez 500 bazkide behar ditu aurrera jarraitzeko, eta, horretarako, kanpaina berezia abiatu dute. Le Mans Eguzkideen 24 orduak emanaldia egingo dute bihar, irratiaren 28. urteurrena ospatzeko eta, bide batez, krisiak eragin dion arriskuari buelta ematen hasteko.

Besteak beste, kuoten bidez lortzen du funtzionatzeko dirua Iruñeko irratiak. 2002an zuzeneko emisioak bertan behera utzi behar izan zituzten, diru ezarengatik. Duela bi urte, berriz, 500 bazkide inguru lortu zituzten aurrera egiteko. Krisiak, ordea, aginka egin dio laguntza horri.

24 ordu, bazkideak lortzeko

Emanaldi berezia ostiraleko 11:00etan hasiko da, eta larunbateko ordu berean amaituko. Irratiaren programazioko saio gehienek hartuko dute parte, baina euren formatoari beste itxura bat emango diote, helburua laguntza lortzea dela kontuan hartuta.

Entzuleek telefonoz deitu ahalko dute irratira, eta laguntzaren truke, elastiko bat jasoko dute, eta zozketa batean sartuko dira. Iruñerria osoan zabaltzen ditu saioak Eguzki Irratiak, eta Eguzki.net gunearen bidez ere entzun daiteke.