Euskal Herrian Michelin izarrak dituzten 37 jatetxetatik lautan soilik dira emakumeak sukaldariburuak. Egoera berdintsua da gainerako ardura postuetan ere. Emakumeak, gutxiago izateaz gain, itzalean daude eta ikusezinak dira. Goi mailako sukaldaritzan euren tokia egin duten bost emakume ezagutuko ditugu bihar Bizigiro gehigarrian: Elena Arzak Donostiako Arzak jatetxeko sukaldariburua, Pilar Idoate Iruñeko Europa jatetxekoa, Aizpea Oihaneder Donostiako Xarma jatetxekoa, Estela Velasco Donostiako Kokotxa jatetxeko jabea eta Silvia Garcia Errenteriako (Gipuzkoa) Mugaritz jatetxeko sommelierra. Emakumeen egoerari buruz arituko dira, haien zailtasunez eta bizipenez. Goi mailako gastronomiako emakumeek sortu berri duten sareaz ere hitz egingo dute.
Gehigarriak, gainera, Nabarraldek argitaratu duen 'Maria Zugarramurdikoa eta sorginduak izan ziren emakumeak' komikiaren berri emango du. Zugarramurdin inkisizioak egindako sarraskiari buruzko komiki laburra da.
Telesailen atalean, ‘Homecoming’-i buruz arituko da Mikel Yarza Artola, podcast batean oinarrituta egin den lehen telesaila da.
Asteburu honetan Elikagai Bankuek Euskal Herri osoan egingo duten elikagai bilketaren berri ere emango du gehigarriak.
