Emanaldi errusiarra Donostian

Donostiako Musika Hamabostaldiak errusiar musikarekin osatutako emanaldia eskainiko du gaur Kursaal Auditoriumean, 20:00etan. San Petesburgoko Orkestra Filarmonikoak, Errusiako orkestra sinfonikorik zaharrenak, herrialdeko konpositore esanguratsuenen piezak joko ditu Iuri Termikanov zuzendariaren gidaritzapean: esate baterako, Nikolai Rimski-Korsakoven Errusiako Pazko handia obertura, Max Brutxen biolinerako 1. kontzertua eta Piotr Ilitx Txaikovskiren 6. sinfonia, Patetikoa.

Sarrerak aspaldi amaitu ziren, gaurko kontzertuak ikusmin handia sortu baitu. Txaikovskiren azken sinfonia interpretatzeko orkestra perfektua da San Petesburgokoa, musikagilearen obrarik tragikoena baita. Txaikovski obra bukatu eta gutxira hil zen, eta hainbat adituren esanetan, heriotza hurbilaren omenez idatzitako pieza da Patetikoa. Horrekin batera, entzuleek Rimski-Korsakoven obra sentimentala eta Brutxen pieza argi eta bizia entzungo dute arratsaldean. Hain zuzen ere, Sayaka Shoji Japoniako biolin jotzaileak eskainiko du Brutxen biolinerako pieza. Musikaria Paganini lehiaketaren irabazle gazteena izan zen, eta Zubin Mehtaren ikaslea izan da.

SAN PETESBURGOKO ORKESTRA FILARMONIKOA

Noiz. Gaur, 20:00etan.

Non. Donostiako Kursaal Auditoriumean.