Euskadi Irratiaren saria jaso du Edurne Pasabanek

SARIAK. 2010eko kirolari onena aukeratzeko Euskadi Irratiak antolatutako saria irabazi zuen Edurne Pasabanek, eta atzo eman zioten saria, Oiongo Faustino upategian: aginte makila eta bere pisua ardotan. Pasabanek esker oneko hitzak izan zituen irratiarentzat, bere mendi ibilbidean eskaini dion babes eta jarraipenagatik. Kirol munduko 43 adituk jo zuten 2010eko kirolari onentzat, eta Pasabanek ozta-ozta hartu zion aurrea Xabi Alonso futbolariari.