«Zer bilatzen duzu harreman batean?», «zer maiztasunez izaten dituzu sexu harremanak?». Kaixomaitia.eus, «euskaldunon harremanetarako gunea», euskal herritarron harreman afektibo eta sexualei buruzko inkesta egiten ari da egunotan, Aztiker soziologia ikergunearekin elkarlanean: «Euskal herritarron harreman sexual eta afektiboei dagokienez ditugun ohiturak, asebetetze mailak eta iritziak ezagutzeko asmoz». 16 urtetik gorako euskal herritarrei zuzendutako galdeketa bat da, guztiz anonimoa. Bertan, besteak beste, bizitza afektiboaren, bizitza sexualaren eta leialtasunaren inguruko galderak egin dituzte. Ikertzaileen arabera, maiatzean egingo dituzte publiko emaitzak, baina horretarako beharrezkoa dute gutxienez 2.500 erantzun jasotzea.
Ez da halako ikerketa bat egiten duen lehen aldia. 2016an ere 73 galderaz osatutako inkesta bat egin zuten. Orduan, 1.500 lagunek hartu zuten parte. Haren arabera, galdetuen artean, %83k dute bere burua heterosexualtzat, %8,9k homosexualtzat, %6,4k bisexualtzat, eta %1,1ek ez dute beren burua aurreko sailkapenetan kokatzen. Gainera, oro har, euskaldunek diote zoriontsu direla arlo afektiboan: batez beste, 6,9ko nota eman diote. Bikotekidearekiko maitasuna ere oso ontzat jotzen dute: 8,5eko nota jarri diote.
