Film mutu musikatua ikusgai

Zinema eta musika uztartuko dituzte, gaur, Zumaiako (Gipuzkoa) Mari kalean, 22:30ean. The Silent Band taldeko musikariek Buster Keatonen hiru film mutu musikatuko dituzte: Fatty Jolas Parkean (Cony Island), nahaspila erromantikoak eta bikotekideen arteko eztabaida txikiak kontatzen diren filma; Ontzia (The Boat), familia baten gorabeherak kontatzen diren filma; eta Sukaldaria (The Cook), hankaz gora dagoen jatetxe bateko sukaldari eta zerbitzari baten istorioa. Ohiko bilakatu da Musika eta zinea saioa, eta Zumaiako musika jaialdian bere lekua hartu du, urteroko legez.

Buster Keaton 1910eko eta 1920ko hamarkadetan puntan ibili zen aktorea da, eta 30 film labur baino gehiago egin zituen protagonista gisa. Ikusleak harritzeko moduko gag berritzaile eta originalez gain, abilezia akrobatiko harrigarriak erakusten ditu. Bere aurpegiera du ezaugarri nagusia, eta ezbehar handienei ere zirkinik egin gabe egiten die aurre.

Ikusleek hiru film dibertigarri edukiko dituzte ikusgai, ongi pasatzeko eta barre egiteko helburua dutenak. Eztabaida eta une tragikoei alderdi komikoa ateratzen die Keatonek, eta Javier Perez de Azpeitiak zuzendutako The Silent Band taldeak eskainitako musikak ikuslea filmean barneratzen du.

THE SILENT BAND - BUSTER KEATON

Noiz. Gaur, 22:30ean.

Non. ZumaiakoMari kalean (Gipuzkoa).