Flamenkoa, lehen eta orain

Xarma duen itsasadarra flamenkoari buruzko jardunaldiak amaitzear daude Bilbon. Gaur ikusi ahal izango da azken emanaldia; Jacob Guerrerok eta Daniel Torresek flamenko ikuskizuna eskainiko dute Bilborock aretoan, 20:00etan. Jardunaldiak bukatzeko, parte hartzaile guztiak Hikaateneoan elkartuko dira, 22:30ean.

Tradizioa oinarri du Mirando al pasado emanaldiak; hala ere, gaur-gaurko flamenkoari ere lekua egingo diote bi dantzariek. Dotoreziaz, indarrez eta kolorez uztartzen dute iragana eta oraina. Ikustera eta entzutera ez ezik, sentitzera ere gonbidatzen dute ikuslea bi dantzariek. Cristina Hoyos dute amabitxi, hura izan baita Guerrero eta Torresen lanaren bultzatzailea. Egun Hoyosen Andaluziako balleteko dantzari nagusiak dira.

Seigarren aldia dute aurtengoan flamenkoaren inguruko jardunaldiek. Irailaren 10ean hasi zituzten, eta artisten belaunaldi berriaren indarra eta adierazkortasuna izan du aurtengoak ardatz. Emanaldiekin batera, tailerrak ere antolatu dituzte. Emakumea eta flamenkoa zikloak eraman du berritasuna: gitarra flamenkoko irakasle bat gonbidatu dute, lehenengoz.

DANIEL TORRES ETA JACOB GUERRERO

Noiz. Gaur, 20:00etan.

Non. Bilbon, Bilborock aretoan.