Gizonezkoa, sasoian dagoena, 1'78-1'95 metro bitarteko altuerakoa, Zumaiakoa edo eskualdekoa, tatuajerik gabea eta, ahal bada, militar gisa esperientziaduna.
Baldintza horiek betetzen dituztenek Zumaian izan dezakete aukera gaur, hala nahi izanez gero. 10:00etan kultur etxean hasi dira Game of Thrones telesailean estra lanetan aritzeko hautaprobak egiten. Interesa dutenek grabaketetarako prest egon behar dute urriaren 21etik 30era bitartean, eta galtza motzetan nahiz mahuka motzeko kamisetan joan beharko dute hautaprobara.
Halaber, beharrezkoa da Nortasun Agiria eta Gizarte Segurantzako zenbakia eramatea. Eguneko, 54 euro garbi ordainduko dituzte. 200 lagun baino ez dituzte hartuko, iristen diren ordenaren arabera.
