Guztientzako hiria da Bilbo

Prozesio erlijiosoak ez ezik, turistikoak ere izan dira Bilbon Aste Santuan. Asteburu honetan bisitari ugari izan dira Bizkaiko hiriburuan, eta horietatik askok atzo izan zuten azken jaieguna. Hiria apurka bisitariz husten ari da hortaz.

«Bi egunetarako etorri gara, eta, garrantzitsuena ikusita, gaur goaz etxera bueltan», zioten Yago eta Marta madrildarrek. Beste askok asteburu osoa eman dute hirian, eskaintza eta giroaz gozatzen. «Bilboko Zazpikaleak goitik behera ezagutzen ditut dagoeneko, egunero ibili baikara han tabernarik taberna poteoan». Alacanteko (Herrialde Katalanak) Cesar Modesek euskal derbia ere ezagutu ahal izan du: «Benetan giro aparta egon zen larunbatean». Hala ere, turismo gastronomikoak bultzatuta etorri da Bilbora, turista asko bezala. «Oporretan irteten garenean askotan joaten gara ongi jaten den lekuetara».

Jan eta edateaz gain, ordea, Bilbok eskaintza zabalagoa du, eta horien bila etorri dira turistak. «Guggenheim museoa ikustera etorri gara batez ere, eta ondoren, hiria ezagutzera», zioen Jesus Urriza iruindarrak. «Eta, egia esan, zer ikusi asko dago: ibai ertza, Zazpikaleak...». Bilbon ezagutzeko dagoena, gainera, dena inguruan dagoela azpimarratu zuen Modes alacantarrak. «Harrituta geratu naiz oinez edozein lekutara joan zaitezkeelako. Horrela ibili gara, aurrera eta atzera...», zioen.

Eguraldia ere lagun izan dute bisitariek. «Apenas egin digun euria. Aurten alderantziz izan da, gainera, penintsula guztian euria egin baitu, eta hemen ia batere ez», zioen Modesek. Tina Arbuelles katalanak ere eskertu du eguraldia: «Orain dela urte batzuk etorri nintzen Bilbora lehenbizikoz, eta ezin izan nuen ezer ikusi, euria eta elurra egin baitzigun. Aurten hiriaz gozatu ahal izan dut». Yago eta Martak hiriaz gain itsasoaz ere gozatu ahal izan dute, kostaldera joan eta bainatzeko aukera ez baitute galdu. «Ura hotza dago, baina urteko lehenengo bainua hartzeko gogoa geneukan».