Hamaikak Eskatzea libre saioa estreinatuko du gaur, 22:00etan, eta datozen asteetan asteartean eta ostegunean emango du. Ekhi Atorrasagasti kazetariak gidatuko du programa. Iragarri duenez, «balkoitik balkoira» egindako saio bat izango da. «Sare sozialetako zappinga egingo dugu; politikoki zuzenak ez diren elkarrizketak tartekatuko dira, kolaboratzaile bereziak, eta tokian tokiko berri emango dute gure berriemaileek». Euskal Herriko eta diasporako euskaldunengana joko dute Hamaikako kideek,«elkarrizketa arinen» bidez: Maule, Gasteiz, Errenteria (Gipuzkoa), Landak (Okzitania), Indiako ozeanoko Mayotte uharteak...
Herritarrek saioan parte hartzea nahi du Hamaikak. Horregatik, deialdia egin dute Whatsapp bidez jendeak kantuak edo eskaintzak egin ditzaten. 688-80 70 93 zenbakira bidali ahalko dira audioak edo bideoak. «Herritarren bozgorailua zabalik izango dugu», azaldu du aurkezleak.
Gainera, Hamaikak ariketa fisikoak egitera animatu nahi ditu herritarrak: horretarako, goizero yoga eta zumba saioak egingo dituzte. Yogakoak Mikel Troitiñok gidatuko ditu, 08:30ean; eta zumbakoak, Elena Carretok, 09:00etan.
