Haurrek gogoz parte hartu zuten herri kiroletan

Jolasen eguna ospatu zuten atzo Donostiako piratek, eta haurrentzako herri kirolak antolatu zituzten goizean. Euria ari zuenez, La Flamenka guneko karparen barruan egin zituzten herri kirolak 40 haur inguruk. Margotzen eta tailerrak egiten aritu ziren txikienak; helduagoak berriz jolasean ibili ziren. Gustura aritu ziren sokatiran, euren indar guztia erabiliz. Lokotxak biltzen, txingak alde batetik bestera eramaten eta giza proban ere aritu ziren, giro ederrean.