Jai erraldoiak txikien gozagarri

Etxarri 2012ko kideek suziria bota eta lehertu zenean hasi ziren atzo Etxarri Aranazko jaiak. Ez zen musikarik falta izan, ezta zereginik ere. Arratsaldean, frontoian elkartu ziren pilotazale eta palazaleak. Gaua, berriz, dantzazaleentzat izan zen. Tximeleta taldeak plaza bete zuen. Gaur, Arañaz elkartearen eguna ospatuko dute, eta berriz ere eguna ekintzaz beteta dator.

Goizean, auzatea prestatuko du Gure Etxea elkarteak. Arratsaldean, haurrentzat Zirika Zirkus taldearen Dantzateke ikuskizuna egingo dute. Herri kirolen emanaldia etorriko da gero; aizkolariak, harri-jasotzaileak eta trontzalariak. Eta egunari Fermin Balentziak emango dio amaiera, musikaz, gauerdian, karpan.

Herriko kuadrillen eguna

Euskaldunen artean kuadrilla ia ezinbestekoa da. Haren barruan badago dantza eta parranda egiterik, baita festetako egun bat antolatzerik ere. Eta hori egin dute etxarriarrek. Kuadrillen Eguna ospatuko dute bihar herritarrek.

Eguerdian, golf zelai birziklatuan jolasteko aukera izango dute haurrek. Ondoren, bertsolaritzak ere lagunartera egingo du salto: Maialen Lujanbiok, Jon Maiak eta Eneko Lazkozek kantatuko dute, 13:30ean, plazan.Gainera, kalejira izango da 19:00etan, gaztetxetik abiatuta. Kalean jira eta bira ibili ondoren, gaztetxean dantzatzeko aukera egongo da, baita kalean ere. KOP eta Nafarroa 1512 taldeek joko dute, gauerdian. Hala, festa giroa ostegunera arte izango da Etxarri Aranatzen.