Jean Christophe Lafaille, gizon txikia bezain alpinista handia

Metro eta hirurogei zentimetroko garaiera zuen, baina alpinismoaren erraldoietako bat izan zen Jean Christophe Lafaille. Alpeetan eta Himalayan bereak eta bi egin zituen, diziplina anitzetan egin ere: kirol eskaladan, alpinismoan, zortzimilakoetan... Euskal mendizaletasunaren lorpenetako baten lekuko izan zen: Alberto Iñurrategik eta biek elkarrekin osatu zuten Annapurnako zeharkaldia, 2002an. Hamalaugarren zortzimilakoa zuen Iñurrategik; arantza ateratzeko modua Lafaillek —Pierre Beghin laguna hil zitzaion Annapurnan, 1992an—. Mendian eman zuen azken hatsa Lafaillek ere; Makalun hil zen, 2006ko urtarrilean, neguko lehen igoera osatu nahian zela.