Kalitate bera prezio baxuagoan

Dendetan aurki daitezkeen produktuak prezio baxuagoan erosteko aukera eskainiko dute hainbat saltokik asteburuan. Stock azokak antolatu dituzte Barakaldoko BEC erakustazokan (Bizkaia) eta Iruñeko Baluarte jauregian, igandera bitarte. Ostiralean zabalduko dute Barakaldokoa; Iruñekoa, aldiz, ostegun arratsaldetik aurrera bisitatu ahal izango da.

%80ko deskontuak iragarri dituzte BEC erakustazokan bilduko diren hainbat dendak. 144 izango dira guztira, eta askotariko produktuak jarriko dituzte salgai: arropa, oinetakoak, bitxiak, altzariak, etxeko tresneria... Ostiral goizetik igande arratsaldera bitarte izango da BECeko stock azokara biltzeko aukera; 11:00etatik 20:00etara zabalduko dute hiru egunetan.

Sarreraren prezioa bi eurokoa da, eta 14 urtez azpikoek ez dute ordaindu beharrik izango. Gainera, haurrentzako txoko bat ere prestatu dute azokan. Tailerrak, jokoak, puzgarriak eta bideojokoak antolatu dituzte, eta begiraleak egongo dira haurrak zaintzeko. Zerbitzu hori doakoa izango da.

Iruñeak bosgarren aldiz hartuko du stock azoka. Baina, aurten kokaleku berria du: autobus geltokia zenetik Baluarte jauregira eramango dute azoka. 56 dendek parte hartuko dute, iaz baino zazpi gehiagok. 79 saltoki egongo dira guztira, eta ostegunean zabalduko ditu ateak azokak, 17:00etan.

Dendarientzat aukera

Ostirala eta larunbatean egun osoan bisitatu ahal izango da azoka, 10:00etatik 21:00etara. Igandean, berriz, goizez bakarrik irekiko dute, 10:00etatik 14:00etara. Doakoa izango da azokan sartzea. Baluartera biltzen denak ere produktuen eskaintza zabala aurkituko du, Barakaldokoaren pareko: arropa, margolanak, bitxiak eta oinetakoak erosi ahalko dira. Stock azokak aukera ona dira eroslearentzat, baita dendarientzat ere: «Dendei biltegian geratu zaizkien produktuak erosleentzako prezio onean saltzea da azokaren helburua», dio Francisco de la Sierra BECeko stock azokako arduradunetako batek. Iruñean, gainera, azokaren kokaleku berria aprobetxatu nahi dute Baluarte jauregia eta inguruak dinamizatzeko.

STOCK AZOKAK

Non. Barakaldon (Bizkaia), BEC erakustazokan. Iruñean, Baluarte jauregian.

Noiz. BECen ostiraletik igandera. Baluarten ostegunetik.

Sarrera. BECen bi euro. Baluarten doan.