KOMUNIKAZIOA. Araban piztu da Hamaika

Hamaika telebista hedatzen ari da Euskal Herrian pixkanaka-pixkanaka, eta aste honetatik aurrera Araban ere ikus daiteke, LTD bidez. Azken piztualdi horrekin Euskal Herrian jada bi milioi ikusle inguruk dute aukera Hamaika Telebista ikusteko -Euskal Herriko biztanleriaren hirutik bik-. LTD bidez edo Euskaltel digitalaren bitartez ikusi ezin dutenek, bestetik, Internet bidez jarrai dezakete Hamaikaren programazioa, www.hamaika.tv atarian.

LTD bidez ikusteko

Hamaika lurreko telebista digitalaren bitartez ikusi ahal izateko, telebista berriz sintonizatu behar da. Alboko mapan agertzen da barruti bakoitzari dagokion kanala.

Behin telebista berriz sintonizatuta Hamaika ikusterik ez badago, etxeko antena nagusiak anplifikadorea behar duelako da. Hartara, etxeko administrariari antena nagusian anplifikagailua jartzeko gomendatzen dio Hamaikak. Behin anplifikagailua jarri ondoren, berriz sintonizatu behar da telebista.

Aste honetan, halaber, Hamaika zuzenean Internet bidez ikusteko aukera jarri dute martxan. Horretarako, www.hamaika.tv webgunean sartu eta pantailaren goialdean ezkerrean jartzen duen «zuzeneko emisioa» zanpatu behar da.

Orain arte, Bilboko egoitzan egindako saioak ikusi ahal izan dira, baina aste batzuk barru Donostialdean egindako ekoizpenak ere emango dituzte.