Sindikatuak kezkatuta daude eta etxe barruan gertatzen ari denaren kronika biltzen ari dira, dosier batean bildu eta laster aurkezteko. Dosier horretan, esate baterako, asteleheneko gertakariak jasoko dituzte.
ETBko erredakzio kontseiluak idatzi bat bidali dio zuzendaritzari, astelehenean gertatutakoaz. Honela dio: «Goizeko txandan, kazetari batek eginda zuen lana atzera bota, eta politika arloburuak berak idatzitako testua eman dio kazetariari irakurtzeko. Kazetariak ez du baldintza horietan lan egiterik onartu, eta azkenean albistea ez da eguerdiko albistegietan sartu». Juan Jose Ibarretxe Eusko Jaurlaritzako lehendakari ohiaren tesi irakurketaren berria ere ez zuten albistegian sartu.
«Arratsaldez, ordea, emaitza oso bestelakoa izan da», jarraitzen du idatziak. «Editoreak zuzen-zuzenean igorri dio kazetari bati arloburuak idatzitako testua». Juan Carlos Viloria Politika arloburuak agindutako testuan Gernikako Estatuaren aurka EAJk izandako kontraesanak kritikatzen ziren. «Arratsaldeko kazetariak testua euskaratu eta lokutatu egin behar izan zuen, baina ez zuen aukerarik ezetz esateko, behin-behineko kontratua duelako». Langileek esan dutenez, horrelako prozedurak «guztiz onartezinak» dira albistegi batean, «profesionalen deontologia eta eskubideak zapaltzen dituelako».
ELA eta LAB sindikatuetako ordezkariek bat egin dute langileen idatziarekin. Bihar langile batzordeko bileran gaiaz eztabaidatuko dute. «Astelehenean hartu zuten erabakiak ildo jakin bat erakusten du, interes politiko batzuekin. Zentsura eta presioak hor daude», dio Gurutz Gorraiz ELAko Komunikabideen Federazioko arduradunak. «Informazio batzuk ezkutatu eta beste batzuk manipulatu egiten dira ETBn». Gertatzen ari denaren kronika biltzen ari dira, eta laster dosier bat aurkeztuko dute.
Miguel Angel Idigorasek langileei ohar batekin erantzun die, eta langileek asteleheneko gertaeraz idatzitakoa ezeztatu du. «Politika arloburuak ez zuen kazetariaren lana baztertu, baizik eta aldaketa eta ñabardura batzuk egin zituen lanaren azken emaitza aberasteko».
