Zarauzko Arrano tabernak (Gipuzkoa) krisi ekonomikoa gertu-gertutik ezagutzeko aukera emango du gaur, 19:30ean. Ez tabernak diru galerak dituelako, finantza krisiaren inguruan hizketan ariko direlako baizik. Isidro Esnaola ekonomialari eta kazetariak hitzaldia emango du, eta El emperador está desnudo dokumentala aztertuko dute gero. Finantza krisia hainbat ikuspuntutatik lantzen du Mirko Bellisek lan horretan: elkarrizketek, datuek, gertaerek eta iruzkinek osatzen dute dokumentala.
Espainiako krisiaren egoeraren eta ondorioen berri emateaz gain, munduko krisi ekonomikoaren jatorria ezagutzeko aukera ematen du Bellisen lanak; 2007ko Wall Streeten hondoratzea, Ibex-35 indizearen jaitsierak eragindako izua eta Lehman Brothersen porrota aipatzen ditu, beste zenbaiten artean.
Dokumentalaren izenburuak «gertatzen ari dena islatzen» duela dio Bellisek: «Denak konturatzen dira zer gertatzen ari den, baina ondorioen beldur dira, eta isilik daude». Helburua ikusleak gaiaren inguruan gogoeta egitea da, eta finantza krisia aztertzearekin batera, komunikabideek askotan azaleratzen ez dutena azaltzea.
FINANTZA KRISIA: HITZALDIA ETA DOKUMENTALA
Noiz. Gaur, 19:30ean.
Non. Zarautzen (Gipuzkoa), Arrano tabernan.
Krisiaren inguruko gogoetak
Finantza krisiaren inguruko hitzaldia eta dokumentala eskainiko dituzte gaur Zarautzen, 19:30ean hasita
Iruzkinak
Ez dago iruzkinik
Ordenatu
