Malko samina zorion itsasoan

Sanferminetako argazkiak generoka sailka daitezkeela dio Iñigo Uriz argazkilariak: lurrean botatako jendea, entzierroak, parranda... «Argazki asko egiten dira, baina oso gutxik ageri dituzte sentimenduak». Horregatik hautatu du 2008ko txupinazoko argazkia. «Inguruko pozaren eta umearen negarraren arteko kontrastea ederra da, baita flashari eta giroko hezetasunari esker sortutako argia ere. Pena sentitu nuen. Teleobjektibo bat neraman, eta umearen aurpegitik 30 bat zentimetrora jarri behar izan nuen kamera. Erreparoa eman zidan, baina...».