Manuel Iradierren itzala Gasteizen

Bizitzako azken urteak jaioterritik kanpo eman zituen arren, Gasteizi estu lotuta dago Manuel Iradierren izena eta izana. Segovian (Espainia) hil zen, 1911. urtean, eta heriotzaren ondotik iritsi zitzaizkion ospea eta aitortza. Abenturazalearen gorazarrez, haren izena jarri zioten Gasteizko kale bati, eta urteen joan-etorriarekin handitu egin zen Iradierren itzala hirian. Mendi elkarte batek eta abesbatza batek Manuel Iradier izena hartu zuten, eta 1989an Elkarte Afrikanista gobernuz kanpoko erakundea sortu zuten, Iradierrek bisitatu zituen Afrikako herriak laguntzeko asmoz. Hiriko zezen plazak Manuel Iradier izena hartuko duela jakinarazi du berriki Udalak. Manuel Iradierren itzala handitzen ari da.