Mobilizazioak hasi dituzte ETBko langileek, batzarrak egin ostean

ETBko Langile Batzordeak deituta, batzarrak egin zituzten herenegun Bilbon eta Miramonen. «Komunikabide publikoaren egoera larria eta negoziazio kolektiboaren eskubidearen bahiketa direla eta, erantzuna eman beharra argi gelditu zen», diote Langile Batzordekoek. Horregatik, mobilizazioak hasi dituzte.

Asteazken gauean egin zuten aurreneko mobilizazioa. EITBko Miramongo egoitzaren aurrean elkarretaratze bat egin zuten langileek, ETB1eko hauteskunde kanpainako eztabaida hasi aurretik. Eta hautagai guztiei ohar bat eman zieten, EITBko zuzendaritza noraezean dabil izenburua duena. «Urte bi agintean, eta ez dakite zer egin EITB aurrera ateratzeko», dio oharrak. Zuzendaritzak kontratu programarik ez izatea onartu duela salatu dute. «900 langile inguruko plantillara heldu nahi dute, langile kopurua jaitsiz, kontuan har- tu gabe zenbat langile behar diren».