Model Your Town lehiaketako finalean da Getaria

Getaria finalera iritsi da Googlek antolatzen duen Model Your Town lehiaketan. Google Earth programa erabiliz hiri bakoitzeko eraikinak 3D modeloetan erakustea da lehiaketaren mamia. Josetxo Perez Fernandez eta Pedro Domecq Agirrek eginiko lanari esker sartu da Gipuzkoako udalerria sei hoberenen artean.

Mundu zabaleko beste 150 herri baino gehiagoren artean sailkatu da Getaria. Finalera ailegatu diren beste bost hiriak hauek dira: Poloniako Zielona eta Torun, AEBetako Lowel eta Evansville, eta Ingalaterrako Leominster.

Bozketa bidez erabakiko dute zein herritako eraikinak islatu dituzten ondoena. Maiatzaren 1a arte bozka daiteke , webgune honetan: http://www.google.com/ intl/eu/sketchup/competitions/modelyourtown/vote.html. Irabazten duen herriak 25.000 dolarreko saria jasoko du, eta herriko ikastetxeari eman beharko dizkio.

Google Sketchup tresnari esker eraiki daitezke eraikinak 3D modeloetan. Eraikin horien argazkiak gainezartzen dituzte ondoren modelo horien gainean. Kaia, moilak, arrain merkatua, argiztapena, jatetxeak, San Anton mendia eta itsasargia, Elkanoren estatua, San Salbador eliza, Balentziaga museoa eta alde zaharreko etxeak diseinatu dituzte hiru dimentsiotan.