Munduko Errugbi Kopari bestelako begirada

Bukatzear da txapelketa. Irailaren 18an hasi zuten Munduko Kopa hogei selekziok. Bi baino ez dira gelditzen: Australia eta Zeelanda Berria. Ohiko arerioak badira ere, inoiz ikusi gabeko finala izango da igandekoa. Hala ere, txapelketa honek bestelako erronkak ere gainditu ditu. Saldutako sarrera kopurua ikaragarria izan da. Lehia hasi aurretik banatuak zeuden Frantzian 2007an saldu ziren adina sarrera. Horrekin batera, telebista datuak ez dira labur gelditzen, igandeko finala 350 milioi lagunek ikusiko dutela aurrekusi baitute. Ikus-entzunezkoen aldeko apostuan sakonduz, Munduko Kopak Youtubeko kanala ireki, eta bertan jarri ditu txapelketak utzitako une ikusgarrienetako batzuk. Hona hemen aukeraketa bat:

Errugbia kontaktu kirola da. Zelaiko azken metroetan zuhur ibili behar da. Estrategia egokiak eta jokalareien abileziek partidak erabaki ditzakete. Hurrengo bideoan, txapelketak utzitako paserik onenen bilduma egin dute:
[YouTube]https://youtu.be/T6EiYwY911A[/YouTube]

Oinarrizko jokaldiak dira atzitzeak. Beste taldeko jokalariak gelditu eta baloia berreskuratzeko ohiko bidea. Irudi bortitzak diruditen arren, berezko legeak dituzte atzitzeek, eta beste kirol batzuetan baino zuzenago bete ohi dira:
[YouTube]https://youtu.be/vYjmj5PTfVI[/YouTube]

Ozeano Bareko hainbat herrialdetako taldeek euren kulturetako dantzak egiten dituzte partiden aurretik. Aurtengo txapelketan Fiji, Samoa eta Zeelanda Berriko taldeek egin dituzte dantzok. Kultura bakoitzeko dantzak izen bat du. Hala nola, Fijikoena Cibi, Samoakoak Siva Tau eta Zeelanda Berrikoak Haka deitzen dira. Maori kulturako berezko dantzak dira Hakak. Zentzu asko dituzte, besteak beste, guda eta ongi etorri dantzak izan daitezke. Hona hemen Namibiaren aurkako partidan Zeelanda Berriak egindako Haka ingleseko azpitituluekin:
[YouTube]https://www.youtube.com/watch?v=SXEzldBHZoU[/YouTube]