«Norberak bere buruari abestuko lizkiokeen kantak aukeratzen ditut»

Boligrafoa alboratu, eta Euskadi Irratiko mikrofonoari heldu dio Juan Garzia idazle eta itzultzaileak (Legazpi, Gipuzkoa, 1955). Aurtengo denboraldian, Musumin irratsaio berria aurkezteaz arduratuko da asteazkenero, 21:00etatik aurrera. Bertan, hainbat garai eta estilotan bidaiatu, eta maitasun kanta ederrenak biltzen saiatuko da, amodioaren kapituluetako bakoitza musikaz hornitzen.

Krisi garai hotz hauetan, entzuleak maitasun abestiekin berotzea ote da irratsaioaren asmoa?

Ez du zerikusirik, baina nik ere uste dut baten batek pentsatuko duela halakorik: nola ezin dugun mundua konpondu, saia gaitezen goxo egoten. Ez da hori. Aurretik ere eskaini izan didate halako saiorik; badakite musikazalea naizela. Orain izan da unea, besterik gabe, teknologia berriek ere laguntzen dutelako halako saio bat egiten; Spotify aplikazioak, adibidez, hainbat garaitako musikak saltseatzeko aukera eskaintzen du.

Saioaren egitura nolakoa da?

Denborak aurrera egin ahala, ikusiko dugu ea zuzenekoetara gonbidatuak ekartzeko eta atal berriak sortzeko aukerarik dugun. Oraingoz, bakarrik nago. Saio bakoitzerako abesti sorta bat aukeratzen dut, amodioaren inguruko gorabehera bati lotuta dagoena. Saiatzen naiz kontrastea sortzen, hau da, kantu guztiak ez daitezen izan erabat melankolikoak; martxa pixka bat sartzen ahalgintzen naiz. Hizkuntza, tonalitate eta sonoritateekin jolasten naiz. Irratsaioa egitea proposatu eta baiezkoa eman nuenean, argi nuen ez nuela arazorik izango abesti zerrenda osatzeko, kanta eder pila daudelako. Baina gai baten inguruan josteak eta kontrasteak zaintzeak badu bere lana. Hori bai, aukeratzen ditudan abesti guztiak entzutekoak dira: entzun, gozatu eta barneratzekoak. Norberak bere buruari isilpean kantatuko lizkiokeenak.

Garai guztietako abestiek izango al dute lekua Musumin saioan?

Bai. Baina egia esan behar bada, badira gaztetatik entzun ditugun abestiak, jada barneratuak ditugunak, onak edo txarrak izan nolabait gure parte direnak. Horrelakoak sartuko ditut noizbehinka. Baita zaharragoak ere. Joan den mendeko lehen hamarkadetako abesti klasikoek tarte handia izango dute. Gainera, askok bertsio berrituak dituzte. Modakorik, ordea, ez dut jarriko, asko ez ditudalako ezagutzen eta, gainera, horiek beste saio batzuetan entzuten direlako. Oro har, ez dira izango ezagunenak, aurreikus daitezkeen abestiak. Hori bai, abesti denak neure egiten ditudanak dira. Sinple eta inozoak izan arren, nonbait grazia harrapatzen diedanak.

Euskal musikariek garrantzi berezia izango dute?

Ez, horretarako badaude beste saio batzuk, euskal musika soilik lantzen dutenak. Nik mundu guztira begiratuko dut; kultura batzuetara ez gara iristen, baina handik eta hemendik edaten saiatuko naiz. Gaiaren hariari ondo badagokio eta abestia gustagarri bada, sartuko dut euskarazkorik ere, noski, baina ez da finkatuta egongo saio bakoitzean halako euskal abesti kopurua sartzea. Eleaniztasun kontua; ni itzultzailea naiz, eta munduko hizkuntzak lantzea dagokit.

Hala ere, zuk euskaratutako hitzakerabiliko dituzue irratsaioan, ezta?

Bai, gogoko dut letrak itzultzea, eta hainbat kantarenak dauzkat itzulita; batzuk sintonietarako erabili ditugu, hain zuzen.Nik itzulitako letra gehienak kantatzeko moduan daude; beraz, entzuleak amodiozkoren bat abestera animatuz gero, jarriko ditugu.

Entzuleen proposamenak jasotzeko prest zaude orduan?

Bai, beti bidal ditzakete euren proposamenak. Lagunen artean ere ibili naiz ideia bila; sare moduko bat zabaldu dut, bestelako erreferentziekin saioa osatzeko. Oraingoz, hasi egin gara, baina podcast atal bat sortu nahi dugu, edukiak bertan jartzeko.

Zein helburu jarri diozu zeure buruari aurkezle gisa?

Gustura entzuten dudan musika partekatzea, besterik gabe. Genero hori gogoko duenari aukeraketa eder bat egitea. Ez dut sekulako arrakasta lortzeko grinarik. Hasiberria naiz, eta nire berriketaldi kaskarrak traba handirik ez egitea espero dut soilik. Baiezkoa eman nuen gustuko jokoa delako niretzat, era horretako erronkak gustatzen zaizkidalako.