Ezpain lodiak, kolorez aldatzen diren begiak, betile amaigabeak, larruazal laua eta leuna, beso gihartsuak, orin simetrikoak… Jada ez dago sare sozialetan erabiltzen diren iragazkiek egin ezin dutenik. Gero eta gehiago dira norberaren itxura edo gorpuzkera moldatuta sare sozialetan pil-pilean dauden iragazkiak erabiltzen dituzten norbanakoak. Influencer delakoek erabiltzen dituzte bereziki, eta askotarikoak dira: ezaugarri ugari dituzte, baina guztiek jarraitzen dute prozedura bera; izan ere, parean jartzen den pertsonaren itxura erreala eraldatzen dute, izan helburu guztiz estetiko batengatik, trufa egiteagatik, edota beste edozein arrazoirengatik.
Orain arte, nahi adina, nahi bestetan eta nahi bezala erabil zitezkeen, eta horrela izaten jarraituko du aurrerantzean ere; Norvegian izan ezik. Bertan, duela gutxi onartu dute argazkietan egiten diren ukitu horien guztien erabilera baldintzatuko duen lege bat. Lege horren ondorioz, iragazkiren bat erabiltzen duten edo irudietan ukituren bat egiten duten influencer eta iragarle guztiek horren jakitun egin beharko dituzte jarraitzaileak, eta igo berri duten irudi hori moldatuta dagoela adierazi beharko dute, argi eta garbi. Beraz, iragazkiak erabili bai, irudiak nahi bezala moldatu eta eraldatu bai, baina haien gustura berregokituak direla ohartarazi beharko dute.
Ohartarazpen horiekin erabiltzaileen autoestimuan eragin nahi dute; izan ere, pertsona, eta, batez ere, gazte askoren kezken sorburu dira horrelako irudiak. Edertasunaren proiekzio irreal bat egiten dute, eta helburu edo jomuga gisa hartzen dituzte miresten dituzten influencer ospetsuen argitalpen guztiak. Era horretan, gorputzarekiko presio etsigarri bat saihestu nahi dute, eta norberaren buruarekiko eta gorputzarekiko harreman osasuntsu bat garatu dezaten sustatu.
Lehendik datorren joera
Ez da, inolaz, joera berri bat argazki moldaketa eta iragazkiena: lehendik datorren moda bat da, baina azken urteotan gehiago hedatu eta garatu da. Horregatik, gero eta egitasmo gehiago ernaltzen ari dira «moda eredu arduragabe» horiekin amaitzeko asmoz. Hainbat influencer ere manifestatu dira horrelako ukituen aurka: Kate Winslet antzezle ezaguna, adibidez, behin baino gehiagotan agertu da praktika horien aurka. Azken adierazpena Mare of Easttown telesailaren harira egin zuen, zuzendariak haren sabela disimulatzeko ukituak egingo zituztela esan zionean. «Ez ausartu hori egitera», erantzun zion antzezleak.
Joera horien indarra apaltzeko ikusi du Norvegiako Gobernuak jarduera hori baldintzatzeko beharra. Influencer delakoei ez ezik, iragarleei ere eragingo die legeak, eta prozedura zehatz bat jarraitu beharko dute moldaketaren bat edo ukituren bat duten irudiak argitaratzerako garaian. Norvegiako Gobernuak zehaztu duenez, ohar edo etiketa jakin bat izan beharko dute horrelako argitalpen guztiek, ikusiko duen erabiltzaileak ukituak izan dituela jakin dezan. Hala, «edertasun irrealaren aurka» egin nahi dute: «Publizitateak haurrengan eta gazteengan duen eragin txarra txikitzen lagunduko du».
