EHU Euskal Herriko Unibertsitateko Saltillo ontzia atzo atera zen Santurtzitik, eta datozen egunetan kostako hainbat herritan izango da. Mikel Lejarza kapitainaren gidaritzapean, unibertsitateko hamalau ikaslek praktikak egingo dituzte ontzian astebete honetan.
Ontzia itsasoratzearen helburua, ordea, ez da ikasleek praktikak egitea soilik. Lekeitioko, Hondarribiko eta Getariako portuetan geratuko da Saltillo, eta nahi duenak ontziari bisita egiteko aukera du. Belaontzien mundua gizarteari hurbiltzea da helburua.
Datorren asteazkenean amaituko du Saltillok bere bidaia Santurtzin, bidaia hasi duen leku berean. Lekeition izango da gaur, hara joan nahi duenarentzat. Ostiralean, berriz, Donostian izango da, igandean Hondarribian, eta asteartean Getarian.
Egun hauetan ontzia ikustera joaterik ez duenak, uda osoan ere izango du aukera. Abuztuaren 24tik 26ra Hondarribiko itsas azokan izango da. Irailaren 19tik 26ra, berriz, Arroxela hiriko (Frantzia) ontzi erakusketan.
Historia handiko ontzia
Saltillo ontziak oroimena balu, makina bat istorio kontatuko lituzke. 1932an eraiki zuten, eta, bi urte geroago, Pedro Galindez enpresari bizkaitarrak erosi zuen. Hainbat urtetan, enpresariak Espainiako errege-erreginei utzi zien ontzia, eta 1968an EHUren esku utzi zuen. Unibertsitateak, ontzia eskola modura erabiltzen du gaur egun, 1998an zaharberritu ondoren.
'Saltillo', portuz portu
EHUko ontzia kostako hainbat herritan izango da egunotan, nahi duenari bertatik bertara ikusteko aukera emanez
Iruzkinak
Ez dago iruzkinik
Ordenatu
