The Indioren lehen bilduma

Bederatzi abestik osatzen dute Broken Silence, The Indio musikariaren bakarkako lehen lana. Julen Rodriguez da The Indio, eta disko berria zuzenean aurkeztuko du gaur Donostian, Fnacen, 19:00etan. Diskoa Internet bidez entzun daiteke, theindio.bandcamp.com helbidean. Gainera, bilduma doan hartzeko aukera ere ematen du webguneak.

Folk, indie eta pop doinuak dakartza The Indiok. Ahotsa eta gitarra nahikoa ditu musika egiteko; barneko sentimenduak kanpora ateratzen ditu oholtzara igotzen denean. Donostian jaioa da, baina musika munduan Ameriketako folka eta pop-a izan ditu gertuen. Micah P. Hinson, Wilco eta The Wave Pictures dira jarraitzen dituen abeslarietako batzuk. Diskoa ekoizteko orduan, Ane Aranbururen laguntza izan du. Elkarrekin egindako lanari esker,«melodiak arte egiten diren tokian» grabatu dituzte abestiak; hau da, etxeko geletan. Ingelesezko abestiak dira denak; horien artean aurki daitezke Four, Stuck In My Head eta Too Far. Bakarkako lana kaleratu aurretik argitaratu zuen maketak oihartzuna izan zuen Interneten, baita musika alternatiboa jorratzen zutenen artean ere. Horri esker, Donostiakluba jaialdian kontzertu bat emateko aukera izan zuen, Josh Rouse eta Damien Juradorekin batera.

THE INDIO

Noiz. Gaur, 19:00etan.

Non. Donostian, Fnacen.