BERRIAren webgunean Tolosako inauteriak jarraitu ahalko dira datozen egunetan. Bihar txupinazoaren inguruko emanaldia aurkeztuko dute Iñigo Terradillosek eta Itzea Urkizuk. 28 Kanalarekin elkarlanean ariko dira 'Ataria' eta BERRIA, eta horrenbestez, telebistaz ere ikusi ahalko da saioa 28 Kanalean. Giroa jasotzeaz gain, Olatz Peon Tolosako alkatea elkarrizketatuko dute. Tolosako Musika Bandako kideekin eta txarangetako musikariekin ere hitz egingo dute. Kalean ibiliko diren herritarrek jaiak nola bizi dituzten kontatuko dute.
Zuzeneko beste hiru saio egingo dituzte Tolosako inauterietan: igandean, astelehenean eta asteartean. Hiru saio horiek 11:30etik 13:30era emango dituzte; 11:00etatik 11:30era kaleko giroa jasoko dute, bestelako hitzik gabe. Programak Axier Imazek eta Josu Ozaitak aurkeztuko dituzte. BERRIA eta 'Ataria' elkarrekin ariko dira saioak egiteko.
BERRIAk, bestalde, datozen egunetan inauteriekin lotutako argazki galeriak eskainiko ditu webgunean.
